Ekonomia botërore po hyn në një periudhë të re sfidash, me Donald Trump që pritet të nisë mandatin e tij të dytë si president i SHBA-së në janar 2025.
Politikat e tij të bazuara në parimin “Amerika e Para” mund të kenë pasoja të gjera, jo vetëm për SHBA-në, por edhe për rendin ekonomik dhe politik global.
Trump ka paralajmëruar tarifa të reja doganore, që variojnë nga 10% deri në 60%, për mallrat nga vende të ndryshme, përfshirë Kinën, Meksikën dhe Kanadanë.
Këto masa mund të shkaktojnë tensione tregtare dhe të godasin zinxhirët globalë të furnizimit. Pasojat do të përfshijnë rritje të çmimeve për konsumatorët dhe humbje ekonomike për partnerët tregtarë të SHBA-së.
Politikat kufizuese ndaj migracionit priten të intensifikohen, me qëndrime më të ashpra ndaj emigrantëve dhe masa që mund të ndikojnë tregun e punës dhe zinxhirët e furnizimit.
Përveç SHBA-së, vende të tjera si Bashkimi Evropian dhe Italia po ndjekin qasje të ngjashme për të menaxhuar migracionin.
Lufta në Ukrainë dhe konflikti mes Izraelit dhe Hamasit janë disa nga sfidat e mëdha gjeopolitike.
Trump ka premtuar zgjidhje të shpejta për luftën në Ukrainë, por një ndërprerje e ndihmave amerikane mund të ndryshojë balancën e konfliktit. Po ashtu, tensionet në Azi, përfshirë ato mbi Tajvanin, mbeten të larta.
Ndërkohë, teknologjia e Inteligjencës Artificiale (IA) po sjell ndryshime të ngadalshme, por të qëndrueshme në ekonominë globale.
Kompanitë e mëdha si Microsoft dhe Google po investojnë në energji bërthamore për të mbështetur infrastrukturën e IA-së. Nëse 2025-a do të jetë viti i shpërthimit të plotë të IA-së, mbetet për t’u parë.
Ekonomia globale në vitin 2025 do të varet nga balanca mes politikave të Trump-it, tensioneve tregtare dhe gjeopolitike, si dhe zhvillimeve teknologjike./DW
