Një nga aleatët më të fortë të Shqipërisë është padyshim Gjermania dhe pikërisht për këtë arsye Deutsche Welle ka zhvilluar një intervistë të rëndësishme.
I ftuar ka qenë politikani gjerman Michael Roth, i cili është pyetur rreth situatës në Shqipëri dhe ku ka komentuar edhe nisjen e negociatave për anëtarësimin e vendit tonë dhe Maqedonisë në BE.
Por përpos anëtarësimit, Roth ka folur edhe për çështje të tjera me rëndësi, si: procesi i Vetting-ut, , përgjimet ku flitet për blerje votash me ndihmën e krimit të organizuar në Durrës, marrëveshja Kosovë-Serbi etj.
Për DW politikani gjerman i është përgjigjur pyetjes rreth protestave të paralajmëruara në shkurt nga opozita, ku ky i fundit është përgjigjur se problemet zgjidhen në parlament jo në protesta.
DW: Opozita ka paralajmëruar për mesin e shkurtit protesta dhe po bën thirrjen për rrëzimin e qeverisë aktuale. Cili do të ishte apeli juaj për të dyja palët?
“Sigurisht që dëshiroj që protestat e paralajmëruara të jenë paqësore dhe të mos kthehen në dhunë. Demonstratat paqësore janë legjitime dhe liria e tubimit është një shtyllë e rëndësishme e kulturës së politikës demokratike. Si student edhe unë kam marrë pjesë në demonstrata. Por vendi qendror i debatit politik midis qeverisë dhe opozitës është parlamenti shqiptar dhe jo rruga. Kjo është arsyeja pse i bëj thirrje opozitës: Shqipëria ende ka detyra të mëdha përpara, të cilat kërkojnë një bashkëpunim të të gjitha forcave politike.”
