Policia ka vazhduar gjatë gjithë natës kërkimet për autorët e ekzekutimit të trefishtë që ndodhi afër mesnatës në Memaliaj. Operacioni kërkimor është zgjeruar në qarqet Gjirokastër, Vlorë, Fier dhe Berat. Forcat e RENEA-s janë angazhuar në terren, përveç efektivëve të drejtorive të policisë në secilin qark.
Gjatë hetimeve, policia ka shoqëruar disa persona që mund të kenë informacione rreth ngjarjes. Ndërkohë, në fshatin Bejaj të Gjirokastrës, është gjetur një automjet tip BMW duke u djegur, i cili dyshohet se është përdorur nga autorët e krimit.
Viktimat e kësaj ngjarjeje janë identifikuar si Shyqyri Kalemi, 74 vjeç, Marsel Çela, 47 vjeç, dhe Gledio Muka, 36 vjeç. Artur Kalemi, 57 vjeç, ka mbetur i plagosur rëndë dhe është në gjendje kritike për jetën. Shyqyri Kalemi është babai i Andrea (Tiku) Kalemit, ndërsa Marsel Çela ishte kamarier dhe Gledio Muka klient në lokal. Artur Kalemi është xhaxhai i Andrea Kalemit.
Burime nga policia bëjnë të ditur se shënjestra kryesore e këtij atentati duket të kenë qenë anëtarët e fisit Kalemi. Shyqyri dhe Artur Kalemi janë të afërm të Adriatik Kalemit, i cili ka shpëtuar nga të paktën tre atentate të mëparshme – një në një ishull të Greqisë, një tjetër në burg dhe një tjetër në Shqipëri. Në janar të këtij viti, një atentat tjetër ndodhi ndaj vëllait të tij, Zamir Kalemit, në Unazën e Madhe në Tiranë.
Hetimet po vazhdojnë intensivisht, ndërsa priten të dalin detaje të reja gjatë ditëve në vijim.
