Policia greke ka arrestuar tetë persona, përfshirë katër efektivë, të dyshuar si pjesë e një grupi kriminal që riprodhonte dhe shiste drogë të sekuestruar në Mykonos.
Ky rrjet kriminal përfshinte policë dhe shtetas shqiptarë, të cilët bashkëpunonin ngushtë, duke shpërndarë lëndën narkotike në treg dhe duke informuar mafian greke për operacionet policore.
Drejtuesi i grupit ishte një oficer 42-vjeçar, i cili ishte pezulluar nga detyra që nga janari 2025 për shkak të një hetimi për mashtrim.
Bashkëpunëtorët e tij përfshinin një oficer tjetër 31-vjeçar nga Stacioni i Policisë së Akropolit dhe dy shefa policie nga Mykonos dhe Akarnasi. Në grup ishin përfshirë edhe disa civilë shqiptarë, mes tyre dy vëllezër dhe partnerja e kreut të organizatës.
Hetimet zbuluan se oficerët kishin sekuestruar drogë nga departamentet e tyre dhe e rikthyen atë për shitje në tregun e paligjshëm. Në dosje janë përfshirë edhe 13 persona të tjerë, përfshirë një shef policie nga Departamenti i Policisë Pydna-Kolindros, i cili gjatë periudhës së hetimit kishte shërbyer në Mykonos.
Përveç trafikimit, grupi kishte lidhje të forta me mafian greke, duke informuar anëtarët e saj për kontrollet policore të ardhshme, çka i lejonte të shmangnin goditjet ligjore. Komunikimet mes anëtarëve të grupit u zbuluan gjatë përgjimeve, duke vërtetuar edhe bashkëpunimin mes oficerëve për transferimin dhe shpërndarjen e drogës.
Në llogaritë bankare të disa prej të arrestuarve u gjetën transaksione me vlerë prej rreth 5 milionë eurosh, të cilat dyshohet se rrjedhin nga aktiviteti kriminal. Një nga të përfshirët, i vëllai i një prej shtetaseve shqiptare në grup, është identifikuar si një nga personat që transportonte dhe kanalizonte drogën e sekuestruar.
Grupi komunikonte kryesisht përmes aplikacioneve të koduara, ndërsa drejtuesi kryesor policor dyshohet se kishte rol edhe në aktivitete të tjera të paligjshme, përfshirë informimin e biznesmenëve për kontrollet në terren.
Hetimet vazhdojnë, ndërsa autoritetet synojnë të zbulojnë të gjitha lidhjet dhe anëtarët e tjerë të rrjetit kriminal.
