Policia e Tiranës ka finalizuar një tjetër operacion antidrogë, duke vënë në pranga pesë persona të dyshuar për trafik të lëndëve narkotike.
Të arrestuarit janë: Erjan Perlleshi, Elsad Germaj, Shaban Nikolli (i njohur ndryshe si Germaj), Egzon Buzalli dhe Alban Prendi.
Sipas njoftimit zyrtar, dy prej të ndaluarve po transportonin rreth 5 kilogramë Cannabis Sativa me një automjet, ndërsa tre të tjerët i shoqëronin me një mjet tjetër, me qëllim sigurimin e rrugës dhe shmangien e kontrolleve policore.
Operacioni u zhvillua nga specialistët për Hetimin e Krimeve të Komisariatit të Policisë Nr. 5, në kuadër të goditjes së veprimtarive kriminale në fushën e narkotikëve.
Gjatë kontrollit, u sekuestruan në cilësinë e provës materiale:
• 2 pako me lëndë narkotike Cannabis Sativa,
• 2 automjete të përdorura në transport,
• 5 aparate celularë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme hetimore.
