Të paktën 21 persona humbën jetën dhe rreth 150 të tjerë u plagosën në orët e para të mëngjesit të së martës në Rripin e Gazës, teksa prisnin ndihma humanitare në një nga pikat e shpërndarjes në qendër të territorit.
Agjencia e Mbrojtjes Civile në Gaza akuzon ushtrinë izraelite për hapje zjarri ndaj civilëve të mbledhur për të marrë ushqim dhe ndihma.
Zëdhënësi i saj, Mahmud Basal, deklaroi se viktimat u goditën nga predha tankesh dhe armë zjarri, duke e cilësuar ngjarjen si një masakër të qëllimshme.
“Forcat pushtuese qëlluan drejtpërdrejt mbi qytetarët që prisnin ndihma. Kemi përballë një krim të ri kundër civilëve të uritur,” tha Basal për agjencinë AFP.
Nga autoritetet izraelite nuk ka ende një reagim zyrtar për këtë incident. Ndërkohë, situata humanitare në Gaza mbetet katastrofike, me mungesa ekstreme në ushqim, ujë dhe ndihma mjekësore.
Organizatat ndërkombëtare për të drejtat e njeriut vazhdojnë të bëjnë thirrje për ndalimin e sulmeve ndaj civilëve dhe për garantimin e aksesit të sigurt për ndihmat humanitare në të gjithë territorin.
Aktualisht, Izraeli ka pezulluar aktivitetin e Kombeve të Bashkuara dhe të shumicës së organizatave humanitare në Gaza, duke lejuar funksionimin vetëm të një subjekti të quajtur Fondacioni Humanitar i Gazës.
Që nga fillimi i veprimtarisë së tij disa javë më parë, mbi 300 civilë që përpiqeshin të merrnin ndihma ushqimore janë vrarë nga forcat izraelite në pika të ndryshme të shpërndarjes.
Nga fundi i muajit të kaluar, kur u ngritën pikat e shpërndarjes humanitare, të paktën 450 palestinezë janë vrarë teksa prisnin ndihma, ndërsa mbi 3.466 të tjerë janë plagosur.
Që nga fillimi i ofensivës izraelite më 7 tetor 2023, numri i përgjithshëm i palestinezëve të vrarë ka arritur në 55.959, ndërsa të plagosurit janë mbi 131.000.
