Të paktën 20 persona humbën jetën në një qendër shpërndarjeje ndihmash në Khan Younis, në jug të Gazës, teksa përpiqeshin të siguronin ushqim.
Sipas Fondacionit Humanitar të Gazës, një organizatë e mbështetur nga SHBA-të dhe Izraeli, 19 prej viktimave u shkelën për vdekje nga turma, ndërsa një tjetër u godit me thikë.
Që prej nisjes së operacioneve të GHF në fund të majit, thuajse çdo ditë janë raportuar vrasje të civilëve palestinezë gjatë shpërndarjes së ndihmave. Dëshmitarë në terren kanë pohuar se shumë nga këto viktima janë qëlluar nga forcat izraelite.
Zyra e Kombeve të Bashkuara për të Drejtat e Njeriut njoftoi se vetëm në gjashtë javët e fundit janë regjistruar 674 vrasje në afërsi të katër pikave të shpërndarjes së GHF-së në Gazën jugore dhe qendrore.
Ndërkohë, 201 vrasje të tjera janë evidentuar përgjatë rrugëve të konvojeve humanitare të OKB-së dhe organizatave të tjera.
Ushtria izraelite ka pranuar se kanë ndodhur incidente ku civilët janë dëmtuar, duke theksuar se po punon për të shmangur “fërkime të mundshme mes trupave dhe civilëve”.
GHF mbështetet në kontraktorë privatë të sigurisë për të shpërndarë ndihma në zonat e kontrolluara nga ushtria izraelite.
Ndërkohë, OKB-ja ka refuzuar të bashkëpunojë me këtë fondacion, duke e konsideruar themelimin e tij si të papranueshëm dhe joetik.
