Çështja e Teatrit Kombëtar është një nga temat më të nxehta ditët e fundit.
Kalimi i ndërtesës në pronësi të Bashkisë së Tiranës dhe votimi nga këshilli bashkiak për prishjen e tij ka revoltuar Aleancën për Mbrojtjen e Teatrit, e cila prej ditësh gjendet në ambientet e Teatrit.
Së fundmi, kryetarja e LSI-së, Monika Kryemadhi ka shkuar në oborrin e Teatrit Kombëtar për të zhvilluar turnin e saj për mbrojtjen e godinës, nga ora 21:00-09:00 të mëngjesit të nesërm.
Në një intervistë për Report Tv, Kryemadhi tha se para se të shkonte në Teatër kishte shkuar për t’u lutur tek Kisha Katolike.
“Në orën 21:00 u luta në Katedralen Katolike dhe më pas erdha në shesh për të zhvilluar dezhurnin tim nga ora 9 e darkës deri në 9 të mëngjesin. Na e ka përcaktuar Aleanca për Mbrojtjen e Teatrit dezhurnin,”-tha Kryemadhi.
Më herët mbrëmjen e sotme u raportua se një mesazh u është dërguar mbështetësve të partisë së LSI, ku i kërkohet një pjesëmarrje të madhe.
“Përshëndetje ! Sonte në orën 20:30 kryetarja do instalohet tek Teatri Kombëtare ku do qëndrojë gjithë natën . Mundohuni të jeni aty edhe me ndonjë mbështetës tonin , është me shumë rëndësi . Ditë të mbare”, thuhet në mesazh.
Kujtojmë se mbrëmjen e djeshme në ambientet e Teatrit Kombëtar ka qëndruar kryedemokrati Lulzim Basha.
