Për të disatën herë, shefi i opozitës Lulzim Basha tregon platformën për të zhbërë koncesionet PPP të oligarkëve, por nuk tregon asnjë emër. Kështu ndodhi edhe mbrëmë në emisionin “Opinion”.
Ai nxori një listë të gjatë me denoncime të PD-së, por nuk denoncoi asnjë emër oligarku. “Këta kanë qenë edhe oligarkët tuaj, a mund të më thoni një emër që nuk ka marrë punë publike në kohën e PD dhe e ka shpikur Rama si oligark?”, kjo ishte pyetja e që e zuri ngushtë Bashën. Ndonëse analisti Baton Haxhiu i kërkoi disa herë të thotë qoftë edhe një emër oligarku, Basha e anashkaloi pyetjen.
“Të gjitha këto janë afera të kohës kur Rama ka qenë kryeministër. Të gjitha këto i bëjnë këta njerëz oligarkë, pikërisht se aferat janë bërë në kohën e Edi Ramës. Zotimi i kësaj platforme është që në këtë sitë do kalojnë edhe koncesione, të dhëna edhe në kohën e qeverisjes së PD”, deklaroi Basha pa dhënë emra konkret.
Heshtja e Bashës bëri përshtypje tek njerëëzit sidomos me drekën e mintrave me oligarkun Samir Mane në Dubai. Shefi i opozitës e kaloi me një postim, ku nuk e përmendte emrin e biznesmenit.
Heshtja e tij nuk lidhet vetëm me implikimet personale me oligarkët, të kohës kur ka qenë në pushtet dhe tani në opozitë. Nuk është thjesht vila në Long Hill ku jeton aktualisht, ajo që i ka lidhur gjuhën. Edhe çështjen e saj Basha e kaloi si një gjë normale, duke përmendur se edhe Rama ka një të tillë.
“Nuk kam asnjë vilë, e kam me qira”, Basha “Jam me qira për arsye familjare të cilat jua kam shpjeguar”, kështu vazhdon të justifikohet Basha për vilën luksoze të dhënë nga biznesmeni Agron Papuli. Për të mjegulluar të vërtetën e tij, në emisionin Opinion, ai përmendi vilën e kryeministrit Edi Rama në Surrel.
“Jo se nuk kam patur mundësi, sepse nuk kam hyrë në politikë i varfër. Unë nuk kam asgjë për të fshehur, ndërsa atij që i ngec në fyt vila e Surrelit, ai mund të përdorë këdo. Vilën e Surrelit ai nuk e justifikon dot, kurse unë jam ballëlartë”, deklaroi kryetari i Partisë Demokratike Lulzim Basha.
Situata, ku krahas kryeministrit që ka në krah oligarkët, kemi edhe opozitën që nuk i lufton, na çon në mendimin se midis Bashës dhe Ramës vazhdon marrëveshja 17 majit, që nuk është bërë asnjë herë publike. Zgjedhjet e vitit 2017 duhet të kenë qenë vetëm një pikë uji në bisedimet e tyre të asaj mbrëmjeje.
Basha nuk dha dorëheqjen pasi humbi ato zgjedhje, por nuk do të japë as pas 25 prillit, nëse humb. Ai do të vazhdojë marrëveshjen e heshtur për të qeverisur së bashku, njëri në pushtet dhe tjetri në opozitë, të dy të mbështetur nga oligarkët.
Pyetjes “A do të largohesh nga politika, nëse humb zgjedhjet?” kryedemokrati Lulzim Basha nuk iu përgjigj.
“Nuk është kjo arsyeja që kemi ardhur të diskutojmë. Sot po diskutohet për fatin e Shqipërisë, jo për të ardhmen time. Sot shumica e dërrmuese e shqiptarëve duan ndryshim”, deklaroi Basha. Pra, kreu i opozitës refuzon të thojë “Po, do largohem nga posti”. Ndoshta llogarit humbjen në zgjedhjet e 25 prillit.
/Gazetareforma.com/
