Ditën e djeshme kryeministri publikoi përgjigjet e pyetjeve që janë bërë në platformën e Këshillimit Kombëtar.
Sipas rezultateve që Rama publikoi shumica e qytetarëve duan që të legalizohet kanabisi për përdorim mjekësor, të ndahet Shqipëria nga Maqedonia e Veriut në procesin drejt integrimit në BE si dhe po ashtu shumica mbështesnin nismën e “Ballkanit të Hapur”.
Pyetësori me 11 pyetje nga qeveria për qytetarët nisi më 19 janar dhe u mbyll më 31 mars.
Theksojmë se procesi nuk ishte transparent dhe zgjati në një interval kohor të gjatë, që lë hapësirë për polemika. Mesa duket me ketë menyrë qeveria gjeti mënyrën se si t’iu ‘mbyllë gojën’ qytetarëve duke u justifikuar se këto vendime vijnë nga veta ata, me vullnetin dhe dëshirën e plotë të shumicës që supozohet që votuan në platformën e Këshillimit Kombëtar.
Edhe ish-drejtuesja e INSTAT, Ines Nurja e ka parë këtë proces me shumë skepticizëm. Ajo është shprehur se përfshirja e Institutit të Statistikave në anketën e Këshillimit Kombëtar të kryeministrit Rama, është në kundërshtim të ligjit.
Nurja për “Syri TV” theksoi se nuk ka ndodhur kurrë më parë që INSTAT të bëhet palë me qeverinë, dhe të prodhojë statistika politike në shkelje ligjore. Sipas saj, Këshillimi është statistikisht nul, pasi pyetjeve u janë përgjigjur vetëm 25 % e popullsisë Gjithashtu Nurja ka theksuarse rezultatet nuk mund të merren si të mirëqenia, në një kohë që është përgjigjur në anketë vetëm 25 % e popullsisë, e aq më tepër që një persona mund ta ketë plotësuar atë më shumë se 1 here. E në këto kushte, Këshillimi bëhet statistikisht nul.
Në lidhje me rezultatet që u publikuan ka reaguar edhe analisti i njohur Andi Bushati i cili e konsideron të gjithë procesin si një “spektakël të inskenuar nga Rama”.
“Kjo gjë u bë për të imponuar para shqiptarëve dhe mbi të gjitha ndërkombëtarëve idenë se disa dëshirat të tij kanë mbështetje të gjërë popullore. Askush nuk ka pasur mundësi të kontrollojë numrin e vërtetë të pjesmarrësve, të shohë përgjigjet reale, apo të monitorojë procesin. “Agjensia për dialog dhe bashkëqeverisje”, që ka luajtur rolin e KQZ-së në këtë “referendum” është e populluar me gra dhe burra që e shohin me venderim çdo gjë që Skënderbeu i tyre nxjerr nga goja”, është shprehur Bushati.
Praktikisht, platforma e Këshillimit Kombëtar ishte një instrument që u përdor nga qeveria Rama për të arritur disa nga gjërat që i kishin synim përgjatë mandatit të tyre të tretë dhe sigurisht tashmë fillon deliri.
Një proces që justifikon “kapriçot” e kryeministrit dhe jo vetëm, platforma e Këshillimit Kombëtar tashmë është një argument i fortë në fjalimet e qeverisë se ajo po e dëgjon popullin dhe se direktivat i merr nga ai. Ndërkohë që realiteti është si e bardha në të zezë, dhe qartazi duket mënyra se si po manipulohen dhe imponohen masat. /Gazeta Reforma
