Ministrja e Arsimit,, Besa Shahini ka folur në lidhje me planin e qeverisë për shkollat.
Në një intervistë për “Report Tv”, Shahini tha se viti shkollor nuk do të përsëritet dhe po përgaiten për të gjitha skenarët.
“Ne shpresojmë që do arrijmë të kthehemi në objektet shkollore para fundit të vitit shkollor se do ishte mirë të bënim 1 ose 2 javë para se të mbylljes viti shkollor. Ne po përgatitemi për cilindo skenar, edhe sikur mos të kthehemi në shkollë. Duhet ta mbyllim vitin shkollor, nuk duhet të përsëritim këtë vit shkollor. Edhe pse kemi prindër që na pyesim, rastet individuale edhe do i lejojmë por jo si gjeneratë e tërë. Testet e maturës do të realizohen. Këto janë qëllimet, duhet të ecim përpara me këtë plan”, tha Shahini.
Shahini vijoi më tej, duke thënë se nëse shkollat nuk hapen brenda majit, viti shkollor mund të shtyhet me 1 muaj, po ashtu edhe aplikimet për në Universitet.
“Nëse nuk arrijmë t’i hapim shkollat në maj, duhet ta shtyjmë pak vitin shkollor. Maturantët i kanë zgjedhur lëndët që duan t’i bëjnë në maturë dhe kanë përzgjedhur ku duan të regjistrohen në fakultet”, u shpreh ministrja.
Kujtojmë këtu se që pas shfaqjes së dy rasteve të para me COVID-19 më 9 mars, mësimi nëpër shkolla është pezulluar.
Nxënësit prej muaji janë duke zhvilluar mësimin online, i cili është shoqëruar me mjaft kritika.
