Një ngjarje tronditëse u regjistrua ditën e djeshme në Tiranë, ku një 25-vjeçare shtatzënë plagosi me thikë bashkëjetuesin e saj pas një konflikti. E reja ka rrëfyer detajet në një intervistë televizive se si ndodhi ngjarja. Ajo tha se bashkëjetuesi i saj e ka kapur për fyti gjatë konfliktit dhe në atë moment kishte një thikë të drejtuar nga vetja. Madje 25-vjeçarja deklaron se ai e ka kërcënuar me thikë duke i thënë se do të vrasë edhe veten. Ajo shton se gjatë tentativës për t’i larguar thikën, bashkëjetuesi është plagosur.
“Ai më kapi prej fyti dhe kishte thikën në dorë. E kishte drejtuar thikën nga vetja dhe thoshte dua të vdes e nuk dua të jetoj më kështu. Shikonte shokët e tij dhe mërzitej. Nuk mund të dilte nga vendi, as natën. Nuk dilnim asnjëherë si çift.
Ai e drejtoi thikën drejt vetes dhe u mundova t’ia hiqja. Kishte veshur një xhup dhe iu ngul pak thika. M’u morën mendtë në atë moment dhe nuk e mbaj mend si ndodhi. Kisha frikë se do më vriste. Më tha se do vriste veten më pas.
Kisha frikë mos vriste fëmijën ose edhe mua. Kam marrë më pas ambulancën në telefon, nuk e lashë ashtu. Nuk kishte gjakderdhje, vetëm dy pika gjaku ranë në shtëpi. Ai tha që iu mor fryma në atë moment. Fëmijën e lamë këtu duke luajtur.
Ambulanca nuk erdhi, mora shokun e tij që e çoi në spital. I thashë që është plagosur Eraldi dhe shkuam në spital. Ai i tha fillimisht që u plagos nëpër shkallë. Më thanë se plaga nuk ishte e madhe. Fola pak dje me Eraldon në spital. Më akuzoi për plagosje. Ti më vrave, më tha. Unë i thashë nuk e bëra unë.
As unë nuk e di çfarë ndodhi në atë moment. E përjetova shumë keq. E kam të ndaluar të shkoj në spital. Nuk kemi folur më. Nuk e di nëse do kthehemi më bashkë. Sot mora një urdhër mbrojtje”, u shpreh ajo.
Gjithashtu, e reja tregoi se bashkëjetuesi i saj është person me precedentë penalë.
“Kur ka qenë Eraldi në Greqi ka goditur një njeri mbrapa kokës dhe ai është i paralizuar tani. Është bërë me paramendim, por nuk e kam pyetur asnjëherë. Ai më tha se e bëri për të vëllanë. Ka qenë 20 vjeç asokohe. Gjithë rininë e kaloi në burg dhe aty e rrihnin vazhdimisht.
Mund të jem budalla më tha, mund të jem çmendur. Kam shkuar te psikologu, por nuk kam vuajtur nga probleme të shëndetit mendor. Mund të kem pak depresion dhe kam pak zërin e lartë. Nuk shkoj me komshien, më tha që jam armikja më e madhe e saj. Kam një teze afër që nuk do të më shohë me sy. Nuk jam divorcuar nga burri i parë, burri ndërroi jetë. Nuk e di pse. Ka bërë aksident me motor”, rrëfeu 25-vjeçarja.
