Mjeku infeksionist Pëllumb Pipero ka deklaruar mbrëmjen e sotme se tani ka ardhur koha që mbajta e maskës të bëhet e detyrueshme me ligj edhe në rrugë.
I ftuar në “Zonë e Lirë” mjeku sqaroi se deri tani ka thënë që maska nuk mund të mbahet në rrugë, por sipas tij nëse qytetarëve nuk u bëhet shprehi ta mbajnë me vete, duhet të jetë me detyrim edhe në rrugë.
“Unë them se ka ardhur momenti që të bëhet me detyrim ligjor mbajtja e maskës. Unë kam thënë se maska nuk duhet të përdoret në rrugë. Edhe sot them që të mos jetë e detyruar që të mbahet në rrugë, por nëse qytetarit nuk i bëhet shprehi dhe të mos mbajë maskë me vete duhet të bëhet me detyrim edhe në rrugë. Nëse nuk mbahet dot distanca, në markete në zyra dhe në çdo mjedis të mbyllur, maska duhet të bëhet me detyrim”, tha Pipero, ndërsa theksoi se karantina nuk ka pse të rikthehet.
Më tej Pipero u shpreh se “nëse maska sot bëhet me detyrim dhe nesër përdoret, numrat e personave të prekur do të bjerë, do të pjestohen me 4”.
Kjo deklaratë e mjekut Pipero vjen pas rekordeve të vazhdueshme me COVID-19 në vend, kujtojmë se ditën e sotme u shënua rekordi i të infektuarve që nga fillimi i pandemisë me 90 të prekur.
Ndërkohë janë shëruar 33 qytetarë, duke e çuar në 1592 numrin e të shëruarve që nga fillimi i epidemisë.
Në vendin tonë aktualisht janë 1088 persona aktivë me Covid-19, kryesisht në Tiranë, Shkodër, Durrës.
