Ka ndërruar jetë pas tre muajsh në koma Arjan Kraja, punonjësi i OSSH-së që shpëtoi nga mbytja dy fëmijë në plazhin e Velipojës. Menjëherë pas aktit, ai pësoi një ishemi të rëndë cerebrale dhe nuk arriti të rikuperohej.
Lajmi u konfirmua nga Operator i Sistemit të Shpërndarjes së Energjisë, ku Kraja kishte shërbyer prej vitesh si shef grupi.
“Me keqardhje të thellë Ekipi i Operatorit të Sistemit të Shpërndarjes OSSH ka marrë lajmin për ndarjen nga jeta të kolegut të dashur, Arjan Kraja. Gjatë viteve të tij në detyrë si shef grup, Arjani u dallua për përkushtimin profesional, ndershmërinë në punë, si dhe mirësinë e tij njerëzore, që e bënte të respektuar e të dashur nga të gjithë kolegët”, thuhet në deklaratën e OSSH-së.
Institucioni i ka shprehur ngushëllimet më të sinqerta familjes, të afërmve dhe miqve të tij.
