Bashkia e Tiranës ka nisur prishjen e godinave të rrezikshme, që u dëmtuan nga tërmeti i 26 nëntorit.
Ditën e sotme është shembur godina e shkollës së Pezës.
Kreu i Bashkisë së Tiranës, Erion Veliaj, gjatë inspektimit u shpreh se të gjitha banesat që janë certifikuar të pabanueshme do të shemben.
Veliaj premtoi se4 shkolla do të ndërtohet sërish, edhe më e madhe.
“Jemi në një situatë ku nuk do marrim asnjë risk në qytetin e Tiranës. Për të gjitha ndërtesat që janë certifikuar si të pabanueshme ose të papërdorshme, do të fillojmë procesin e prishjes, për t’i bërë më të reja dhe më të bukura. Rasti i parë është rasti i shkollës në Pezë, e cila në tërmetin e datës 21 shtator pati pak dëmtime, kurse në tërmetin e 26 nëntorit pati dëmtime në konstruksion. Është një shkollë 40-50 vjeçare, për 200 nxënës, por do ta bëjmë më të madhe, për 300 nxënës, do të shtojmë edhe palestrën”, tha Veliaj.
Më tej kryebashkiaku theksoi se nuk do të rrezikojë jetët e qytetarëve, për ndërtime që nuk ofrojnë garanci dhe nuk janë të qëndrueshme.
“Në këtë fazë është shumë e rëndësishme, nëse është shkollë, apo nëse është një ndërtesë industriale, apo nëse është një ndërtesë private, siç mund të jenë pallatet, kur vendimi zyrtar thotë se janë të pabanueshme, nuk do marrim më asnjë risk. Duhet që nga çdo eksperiencë, nga çdo sfidë, të bëhemi më të përgatitur për sfidën dhe eksperiencën e ardhshme”, tha Veliaj.
