Prej javësh Coronavirusi ka paralizuar botën, por ditët e fundit situata është bërë më alarmante me përhapjen e virusit në Europë dhe në Amerikën Latine.
Deri më tani kanë humbur jetën të paktën 2,869 dhe janë infektuar rreth 84 mijë persona, ndërsa ditën e djeshme OBSH njoftoi se numri i të prekurve tashmë është më i lartë jashtë Kinës.
Situata më problematike vijon të jetë në Itali, ku numri i të prekurve dhe viktimave rritet në frikshëm dita-ditës.
Së fundmi, numri i viktimave ka shkuar në 21 dhe deri më tani regjistrohen plot 821 të infektuar.
COVID-19 ka prekur kryesisht veriun e Italisë, ku në Milano janë vendosur në karantinë mbi 50 mijë persona, megjithëse raste të të infektuarve janë shfaqur edhe në jug të vendit.
Në fillim të kësaj jave, Organizata Botërore e Shëndetit paralajmëroi se ndodhemi në prag të një pandemie, teksa ditën e djeshme Drejtori i Përgjithshëm i OBSH vlerësoi se epidemia e Coronavirusit ka arritur në një “pikë vendimtare” dhe u bëri thirrje vendeve të veprojnë “me shpejtësi” për të frenuar virusin shumë të rrezikshëm.
Numri i të infektuarve më i lartë jashtë Kinës, OBSH: “Epidemia e Coronavirusit në pikën vendimtare”
Në vendin tonë, fatmirësisht nuk është regjistruar asnjë i prekur, teksa kryeministri Edi Rama ka mbledhur dje Komitetin Kombëtar të Sigurisë, pjesë e të cilës ishin ministra dhe zyrtarë të tjerë , ku temë diskutimi ishin masat e marra kundër Coronavirusit.
Rama mbledh Komitetin Kombëtar të Sigurisë, tregon se ku do të ngrihet karantina
