India është bërë vendi i radhës që është goditur rëndë nga reshjet masive dhe përmbytjet. Të paktën 112 njerëz kanë humbur jetën në shtetin perëndimor indian Maharashtra, pasi shirat e rrëmbyeshëm të musoneve shkaktuan rrëshqitje toke dhe përmbytën zona të ulëta.
Autoritetet evakuuan njerëzit nga zonat e prekura, teksa zbrazën ujin nga digat që rrezikonin të derdheshin.
“Reshjet e papritura të shiut shkaktuan rrëshqitje dheu në shumë vende dhe përmbytën lumenj. Ne jemi të detyruar të lëshojmë ujë nga digat dhe, në përputhje me rrethanat, ne po lëvizim njerëzit që banojnë pranë brigjeve të lumit në vende më të sigurta”, u tha gazetarëve Kryeministri Uddhav Thackeray, i cili kryeson qeverinë e shtetit të Maharashtra
Të paktën 38 njerëz u vranë në Taliye, 180 km në juglindje të kryeqytetit financiar Mumbai, kur një rrëshqitje toke rrafshoi pjesën më të madhe të fshatit të vogël, thanë zyrtarët e qeverisë së shtetit.
Në nëntë rrëshqitje të dheut në pjesë të tjera të Maharashtra 59 njerëz vdiqën dhe 15 të tjerë u vranë në aksidente të lidhura me reshjet e mëdha të shiut. Ndërkohë, qindra fshatra dhe qytete mbetën pa energji elektrike dhe ujë të pijshëm.
Shirat sezonale të musoneve nga qershori deri në shtator shkaktojnë vdekje dhe zhvendosje masive në Azinë Jugore çdo vit, por ato gjithashtu japin më shumë se 70% të reshjeve të Indisë dhe janë thelbësore për fermerët.
