Deputeti i zgjedhur i Partisë Demokratike, Agron Gjekmarkaj ka folur ditën e sotme në lidhje me zhvillimet e fundit politike në vend. Gjekmarkaj ndër të tjera ka thënë se vendimi i marrë nga kreu i PD-së në lidhje me ish-kryeministrin, Sali Berisha është i vështirë. I ftuar në “Opinion”, Gjekmarkaj tha se Basha nuk mund të shndërrohej në një ‘Haxhi Qamil’, term i përdorur shumë herë nga kryeministri Edi Rama për të krahasuar Opozitën dhe Presidentin Ilir Meta.
Gjithashtu Gjekmarkaj ka thënë se procedura që ka zgjedhur Basha nuk e bind, por sipas tij kreu i PD-së nuk ka pasur zgjidhje tjetër, pasi ka qenë përball presionit të vazhdueshëm të SHBA-ve. Ai ka shtuar se strukturat e PD-së janë në trishtim të thellë dhe se vendimin e Blinken për Berishën nuk e mbështet.
“Në PD nuk ka ngazëllim, është ngjarje traumatike, ngjarje më e vështirë se 1997, përjashtimi i Sali Berishës, nga pikëpamja emocionale. Por unë e kam thënë. Gjykimin e ndërtoj mbi ato që di, mbase nuk i di të gjitha. Lulzim Basha ishte i detyruar. Basha nuk mund të shndërrohej në një Haxhi Qamil që të thoshte kam Shijakun e Kavajën me vete kundër Amerikës. Procedura që ka zgjedhur Basha nuk më bind, nuk është parimore, por ka marrë përgjegjësi. Lulzim Basha nuk kishte zgjedhje tjetër, ishte në rrezik Partia Demokratike. Unë personalisht e kam konsideruar të padrejtë vendimin e Blinken për Berishën, por Basha nuk kishte zgjedhje tjetër. Presioni vinte nga SHBA-ja nga Reeker. Strukturat janë në trishtim të thellë,”- tha Gjekmarkaj.
