Para protestës së opozitës është bërë me dije se krerët e opozitës kanë marrë një telefonatë nga Ndihmës Sekretari i Shtetit për Evropën, Matthew Palmer.
Në një deklaratë, Kryemadhi ka treguar për këtë telefonatë, dhe tregon se ia ka sqaruar zyrtarit të DASH e cila ishte arsyeja e marrjes së vendimit për djegien e mandateve.
Për më tepër Kryemadhi tregon se e ka siguruar se ditën e sotme protesta nuk do të kishte akte dhune dhe kështu ndodhi.
“Ai më sqaroi sa e rëndësishme është demokracia, që institucionet kushtetuese të funksionojnë. Unë i shpjegova pse i dogja mandatet. I kam thënë se Shqipëria është shndërruar në një shtet ku lulëzon krimi i organizuar, lavatriçe e pastrimit të parave të krimit dhe drogë. I shpjegova se nuk mund të qëndronim në një parlament të ngritur nga shitblerja e votës. Janë të deklaruara dhe të vulosura nga Zëri i Amerikës. I shpjegova që përgjigjet e antimafias italiane përmendin mijëra euro për blerje votash në Tiranë dhe Vlorë. Në fund ai më tha: Të kuptoj shumë mirë, vetëm protesta të jetë paqësore nesër”,– sqaroi Kryemadhi për News 24.
