Ish-kryeministri Sali Berisha ka njoftuar mbledhjen e Kuvendit Kombëtar më 2 dhjetor. Mësohet se Berisha e ka thirrur këtë Kuvend për të kërkuar votëbesimin, pas humbjes së zgjedhjeve të 14 majit.
Po ashtu thuhet se në rend dite janë edhe disa pika të tjera që lidhen me zhvillimet e brendshme në parti dhe situatën aktuale të vendit.
Njoftimi i grupit të Berishës:
Pas konsultimit me forumet, Kryesia e Partisë Demokratike në mbledhjen e datës 9 tetor 2023, vendosi thirrjen e Kuvendit Kombëtar të Partisë Demokratike më datë 2 dhjetor, 2023, ora 11.00 në Pallatin e Kongreseve.
Gjatë këtij Kuvendi të Jashtëzakonshëm për fatet e PD, opozitës dhe shoqërisë, në kushtet e një qeverie që ka kapur të gjitha pushtetet, bazuar në statutin e Partisë Demokratike, do të bëhet votëbesimi i kryetarit të partisë.
Në rendin e ditës janë edhe disa pika të tjera që lidhen me zhvillimet e brendshme në parti dhe gjendjen ku e ka futur Shqipërinë politika anti-shoqërore dhe anti-kombëtare e Edi Ramës.
