Pas takimit me delegacionin e PE-së nuk kishte si të mungonte edhe reagimi i kreut të PD-së, Lulzim Bashës. Basha është shprehur se takimi ka shkuar mirë dhe problemi më i madh i hasur ka qenë keqinformimi që qeveria iu kishte bërë për situatën.
“Folëm hapur dhe shkoqur me miqtë tanë”, theksoi Basha, ndërsa në krah të tij ishin aleatët. Kryedemokrati tha se e vetmja zgjidhje është një qeveri tranzitore, zgjedhje të lira e të ndershme që sipas tij do t’i kthejë legjitimitetin institucioneve.
I pyetur nga gazetarët nëse ndërkombëtarët kanë ndryshuar qëndrimet e ashpra për djegien e mandateve dhe protestat, Basha tha se faktori ndërkombëtar ka pasur gjithmonë shqetësim stabilitetin dhe kjo është e kuptueshme.
Megjithatë kur është pyetur nëse do të ketë një tryezë të përbashkët bisedimi të mbikëqyrur nga ndërkombëtarët, Basha ka thënë:- “Nuk do ketë një 2017 tjetër, Edi Rama e morri 2017 dhe e ktheu në dosjen 339. Shkatërroi procesin zgjedhor që të kapte tepsinë”.
