Është finalizuar operacioni ndërkombëtar i koduar “Kitchen”, ku morën pjesë policia e Italisë, Belgjikës, Shqipërisë, Gjermanisë dhe Spanjës.
Në qendër të operacionit ka qenë një grup kriminal i përfshirë në trafikimin ndërkombëtar të lëndëve narkotike, të grabitjes me armë, armëmbajtjes pa leje dhe trafikimit të tyre.
Në përfundim të operacionit janë ekzekutuar gjithsej 35 urdhra arresti të lëshuara nga autoriteti gjyqësor i Brescias, Itali, nga këta 27 janë arrestuar, ndërsa 8 janë shpallur në kërkim.
Në Shqipëri është vënë në pranga shtetasi P. H., 33 vjeç, banues në Peqin, si dhe është shpallur në kërkim shtetasi J. S.
Ndaj tyre është caktuar masa e sigurimit “Arrest në burg”, për kryerjen e veprës penale ”Trafikimi i lëndëve narkotike”, në shkurt të këtij viti nga Gjykata e Brescias.
Sipas policisë, hetimi fillimisht ka nisur ndaj një grupi marokenësh dhe italianësh që trafikonin hashash nga Maroku, mirëpo më pas janë zbuluar edhe 4 anëtarë me origjinë shqiptare.
Këta të fundit trafikonin kokainë nga Holanda, duke furnizuar tregun në Italinë e Veriut e saktësisht në zonën e Brescias.
Hetimi ka filluar në muajin tetor të vitit 2017 dhe ka vijuar me intensitet duke sjellë arrestime dhe goditje gjatë vitit 2018, kur janë bërë edhe sekuestrimet dhe arrestimet më të shumta.
Ndaj të arrestuarve rëndojnë një sërë akuzash, si: “Trafiku ndërkombëtar i lëndëve narkotike në bashkëpunim”, “Mbajtje dhe shpërndarje të lëndëve narkotike”, “Grabitje”, “Mbajtje dhe dhënie të armëve luftarake”.
