Pas 2 orësh ka përfunduar mbledhja e Këshillit Politik, ku u diskutuan amendamentet në projektligjin e Kodit Zgjedhore të hartuara nga ekspertët.
Marrëveshja e arritur mes palëve për Reformën Zgjedhore ka intensifikuar mbledhjet e Këshillit Politik, për të diskutuar çështjet dhe pikat e arritura me detaje.
Disa nga pikat e pasqyruara në këtë draft lidhen me kuotën gjinore, përbërjen e KQZ, votën e emigrantëve, roli i medias në fushatat zgjedhore, financimi i partive politike si dhe Kolegji Gjyqësor Zgjedhor, të cilat pritet të diskutohen në mbledhjen e sotme me ekspertët për të bërë ndryshimet përfundimtare.
Ditën e nesërme, e martë 16 qershor do të mblidhet edhe Komisioni Parlamentar për Reformën Zgjedhore për të informuar dhe paraqitur ndryshimet e arritura që do të reflektojnë marrëveshjen e arritur mes palëve.
Çfarë është vendosur deri tani?
Reklamat në fushatë do të lejohen, por jo materiale të parapërgatitura.
Vota e emigrantëve do të jetë përgjegjësi e KQZ dhe do të administrohet dhe monitorohet nga ajo.
Përbërja e KQZ e ndarë në 3 nivele që është Komisioneri që ushtron kompetencat ekzekutive dhe drejton KQZ, Rregullatori që miraton aktet normative dhe rregullat në zgjedhje dhe KAS që shqyrton ankimimet në zgjedhje. Ndërkohë që implementimi i teknologjisë për identifikimin biometrik është përgjegjësi e nënkomisionerit.
Kolegji Gjyqësor Zgjedhor do të funksionojë me 8 anëtarë nga 10 që kanë qenë dhe të gjithë anëtarët duhet të kenë kaluar vettingun.
Kujtojmë se marrëveshja e arritur për zgjedhoren në Këshillin Politik nuk është pranuar nga opozita parlamentare, e cila kanë dërguar kërkesat e saj në Kuvend duke kërkuar lista të hapura, ndryshim të sistemit zgjedhor dhe moslejimin e koalicioneve parazgjedhore.
