Ministri i Punëve të Brendshme, Pançe Toshkovski, ka njoftuar se është përmbyllur procesi i autopsisë për 59 viktimat e tragjedisë në Koçan. Gjatë një konference për mediat, ai konfirmoi se të gjitha viktimat janë identifikuar dhe se procedurat për autopsinë përfunduan më 18 mars 2025.
196 të plagosur, 80 të transportuar jashtë vendit
Sipas ministrit Toshkovski, nga zjarri tragjik kanë mbetur të lënduar 196 persona, mes tyre 20 fëmijë. Aktualisht, 93 të plagosur po marrin trajtim mjekësor në spitalet e Shkupit, ndërsa 80 të tjerë janë transportuar për trajtim jashtë vendit. Ata janë dërguar në disa shtete, përfshirë Serbinë, Bullgarinë, Turqinë, Greqinë, Austrinë, Lituaninë, Slloveninë, Hungarinë dhe Kroacinë.
Ceremonia mortore do të mbahet të enjten
Drejtori i Komisionit Qendror Ushtarak, Stojançe Angelov, ka njoftuar se ceremonia e varrimit për viktimat do të zhvillohet të enjten, më 20 mars. Ora e saktë e ceremonisë do të bëhet e ditur më vonë.
“Në varrim do të marrin pjesë kreu i Kishës Ortodokse Maqedonase, Shenjtëria e tij Stefan, si dhe disa peshkopë nga Sinodi. Kisha po bën gjithçka që këta fëmijë të largohen në mënyrë sa më dinjitoze”, ka deklaruar Angelov.
Ai gjithashtu siguroi se të gjitha përgatitjet për ceremoninë mortore janë në përfundim e sipër dhe se gjithçka e nevojshme për organizimin e saj është siguruar.
