Pas arrestimit të bashkëshortit për mashtrim, në pranga ka përfunduar edhe 30-vjeçarja Migena Kajolli.
Ndaj saj Gjykata e Apelit të Vlorës kishte vendosur 8 vite burg.
Kajolli ishtë lënë në arrest shtëpie, por gjykata e riktheu në burg, shkruan “Balkanweb”.
Fisnik dhe Migena Kajolli kishin nisur mashtrimin me skemën e punësimit që prej 2016-ës.
Ata u arrestuan më 22 maj të 2018-ës, ku bashkëshorti i saj përfundoi në burg, ndërsa 30-vjeçarja në arrest shtëpie.
Në këmbim të parave ata kanë mashtruar dhjetëra persona, duke u premtuar se do t’i punësonin në kompani, që kryesisht operonin në sektorin e hidrokarbureve.
Nga kjo skemë çifti ka përfituar shumën e 200 mijë eurove.
Për ta bërë skemën të besueshme, Migena Kajolli u thoshte klientëve, se në telefonin e tyre do të vinte një mesazh konfirmimi nga kompania.
Pasi kalonin disa ditë, në telefonin e viktimave, vinte mesazhi, se kërkesa e tyre po shqyrtohej.
Nga hetimet rezulton se mesazhet e konfirmimit i niste 30-vjeçarja.
Gjithashtu çifti Kajolli nënshkruante kontrata noteriale, se paratë ua kishin marrë në formë borxhi klientëve.
Hetuesit janë mbështetur në komunikimet telefonike, për të zbardhur skemën e mashtrimit, pas dhjetëra denoncimeveve të ardhura në adresë të çiftit.
Paratë e përfituara nëpërmjet mashtrimit, çifti i përdorte për të bërë jetë luksi.
