Pesë shqiptarë janë arrestuar në Zvicër, pasi policia zbuloi skemën e tyre të mashtrimit ndaj shtetit, me qëllim përfitimin e kredive për shkak të pandemisë.
Kanë qenë mediat zviceriane ato që kanë bërë publike lajmin, ku shkruhet se personat e dyshuar thuhet se kanë marrë kredi të njohura si “COVID”, të cilat arrijnë shumën prej disa qindra mijëra frangash.
Mësohet se ata i kanë marrë në banka të ndryshme me informacione të rreme.
Të arrestuarit janë katër burra dhe një grua, të moshave nga 21 deri 52-vjeçare.
Gjatë kontrollimit të banesave të të dyshuarve janë sekuestruar dokumente, bartës të dhënash (cd) dhe mjete pasurore.
Dy prej tyre janë lënë të lirë, pasi janë marrë në pyetje nga policia ndërsa tre të tjerët vazhdojnë të jenë në paraburgim.
Kujtojmë këtu se që nga shpërthimi i pandemisë, Zvicra, me qëllim të mbështetjes së bizneseve të prekura nga kjo krizë, ka dhënë kredi, të quajtura “Covid”.
Shumë persona e kanë shfrytqzuar rastin për të përfituar pa bazë, nën pretkestin e dëmit të pësuar nga masat e koronavirusit.
Janë të shumtë personat që nuk janë vënë ende para drejtësisë për mashtrimet e tyre në lidhje me përfitimet ndaj Covid-19.
