Partia Demokratike ka denoncuar planin e qeverisë për shembjen e godinës së Drejtorisë së Përgjithshme të Tatimeve, pranë stadiumit Dinamo, për të ndërtuar një kullë 40 katëshe. Anëtari i Kryesisë së PD-së, Grigels Muçollari, ka akuzuar kryeministrin Edi Rama për dhënie të pronave publike në shërbim të interesave private, duke theksuar se ky veprim shton betonin dhe ngushton hapësirat publike në qytet.
“Jemi këtu tek zyrat e Drejtorisë së Përgjithshme të Tatimeve, pranë Stadiumit Dinamo. Kjo godinë pas meje është në planet e Edi Ramës për t’u shembur dhe për t’iu dhënë një privati për të ndërtuar një kullë 40 katëshe ose më shumë,” tha Muçollari. Ai shtoi se ky vendim është marrë pa asnjë konsultë dhe nuk i shërben aspak interesave të qytetarëve.
Muçollari theksoi se ndërtimi i një tjetër kulle do të shtojë betonin dhe do të ngushtojë hapësirat e përbashkëta, duke përkeqësuar problemin e strehimit në qytet. “Çmimet e këtyre kullave janë aq të larta, sa janë të paprekshme për qytetarët e zakonshëm të këtij vendi. Qëllimi i Ramës nuk është ky, por futja në ekonomi dhe pastrimi i një sasie tjetër të madhe të parave të pista,” shtoi ai.
Duke folur për keqmenaxhimin e pronave publike, Muçollari deklaroi: “Është e papranueshme që Edi Rama të sillet si pronar i këtyre godinave. Këto janë prona publike dhe shtetërore, të ndërtuara me kontributin e shqiptarëve dhe taksapaguesve të këtij vendi.”
Partia Demokratike e konsideron këtë plan si një tjetër akt të klientelizmit dhe korrupsionit në nivele alarmante, duke akuzuar qeverinë për favorizimin e miqve dhe oligarkëve të afërt me kryeministrin Rama. “Ne e dimë mirë se këtu, që është një nga vendet më të shtrenjta në Tiranë, godinat shtetërore do të shemben për t’u kthyer në prona të miqve të Ramës dhe oligarkëve,” tha Muçollari.
Ai bëri thirrje për reagim dhe kundërshtim nga qytetarët ndaj kësaj afere të re korruptive. “Qytetarët nuk duhet ta pranojnë një aferë të re nga kjo qeveri. Duhet reagim. Duhet kundërshtim. Nesër mblidhemi sërish para Bashkisë dhe ngremë zërin ndaj korrupsionit dhe padrejtësive,” përfundoi Muçollari.
