Partia Demokratike ka reaguar ndaj deklaratave të Policisë së Shtetit, sipas të cilave gjatë protestës kombëtare të opozitës janë plagosur 12 efektivë policie. Në një deklaratë zyrtare, PD i ka cilësuar këto pretendime si të pabaza dhe mashtruese.
Sipas Partisë Demokratike, nga informacionet e mbledhura në mënyrë operative në të gjitha spitalet e Tiranës, nuk rezulton që asnjë efektiv policie të jetë paraqitur për ndihmë të parë pas protestës.
Nga ana tjetër, selia blu deklaron se gjatë tubimit janë lënduar dhjetëra protestues dhe dhjetëra të tjerë janë arrestuar. PD pretendon se disa nga ndalimet janë kryer në mënyrë të paligjshme nga persona pa uniformë dhe pa simbole policie, të cilët i cilëson si patronazhistë të qeverisë.
Në deklaratën e saj, Partia Demokratike shprehet se përpjekja për ta paraqitur protestën si të dhunshme është një tentativë për të shtrembëruar realitetin e një proteste masive kundër qeverisë. Sipas PD-së, kjo situatë pasqyron frikën e kryeministrit dhe bashkëpunëtorëve të tij për zhvillimet politike në vend.
Partia Demokratike thekson gjithashtu se çdo tejkalim i ligjit do të dokumentohet dhe, sipas saj, çdo person përgjegjës për abuzime do të mbajë përgjegjësi të plotë. Në përfundim, PD falënderon protestuesit për pjesëmarrjen dhe siguron të ndaluarit dhe familjarët e tyre se do të marrin mbështetje dhe ndihmë ligjore.
