Ambasada e SHBA-ve u ka bërë thirrje shtetasve amerikanë në Shqipëri që të shmangin lëvizjen para kryeministrisë këtë pasdite, për shkak të protestës që do të mbahet. Mirëpo, në njoftimin e publikuar në rrjetet sociale, Ambasada kishte bërë fillimisht një ngatërresë, duke shkruajtur se protesta është thirrur nga Partia Demokratike.
“Partia Demokratike e Shqipërisë ka njoftuar se do të mbajë një protestë pranë zyrës së Kryeministrit. Qëllimi i deklaruar është kundër rritjes së kostos së energjisë elektrike në Shqipëri”, thuhej në njoftimin e parë.
Postimi është ndryshuar më pas dhe nuk cilësohet se nga kush është thirrur protesta, ndërsa thirrja për qytetarët amerikanë mbetet e njëjtë
“Një protestë është paralajmëruar për këtë pasdite para Kryeministrisë. Kjo protestë mund të migrojë në vende të tjera në Tiranë, ose tubime të ngjashme mund të shfaqen në pjesë të tjera të qytetit. Kohëzgjatja e mbledhjes së pritshme është e panjohur”, thuhet në njoftimin e përditësuar.
Kujtojmë që një protest qytetare është thirrur ditën e sotme para kryeministrisë në orën 17:00. Kanë qenë vetë qytetarët ata që e kanë thirrur protestën, kundër rritjes së çmimit të produkteve të shportës, naftës, energjisë elektrike etj. Kujtojmë që çmimet e shumë produkteve janë rritur javët e fundit, duke filluar me çmimin e bukës e për të vazhduar me të tjerat.
