Partia Demokratike ka ankimuar në Kloegjin Zgjedhor vendimin e KAS PËR Gjirokastrën. Ka qenë përfaqësuesi ligjor i PD, Marash Logu që e ka bërë të ditur diçka të tillë në një postim ku shkruan se PD do të kërkojë pavlefshmërinë dhe përsëritjen e zgjedhjeve. Logu thotë se detyra e PD është të vazhdojë betejën në çdo front për zbardhjen e masakrës zgjedhore.
“Dorëzuam sot në Kolegjin Zgjedhor padinë kundër vendimit të KAS për Gjirokastrën, duke kërkuar pavlefshmërinë dhe përsëritjen e zgjedhjeve. Detyra jonë para shqiptarëve është të vazhdojmë betejën në çdo front, me çdo mjet dhe mundësi për zbardhjen e masakrës zgjedhore Rama-Doshi”, shkruan Logu.
Në një reagim pas vendimit të KAS, Logu tha se këta të fundit ishin ndikuar politikisht dhe kishin vepruar pa baza ligjore.
Më herët vendimin e KAS për qarkun e Gjirokastrës e ankimoi edhe Lëvizja Socialiste për Integrim që kërkoi ripërtëritjen e zgjedhjeve për Qarkun e Gjirokastrës në Bashkinë e Dropullit dhe shpalljen e pavlefshme të zgjedhjeve për gjithë qarkun.
Komisioni i Ankesave dhe Sanksioneve i rrëzoi kërkesat e PD dhe LSI duke i shpallur të vlefshme zgjedhjet. Gjithashtu LSI ka hedhur akuza edhe jatë shqyrtimit të çështjes në KAS për moslejimin e emigrantëve për të votuar në zgjedhje si dhe kishte indicie edhe për votim të dyfishtë.
