Edhe pse pacientët e prekur me koronavirus negativizohen, sërish nuk është ende një betejë e fituar ndaj virusit.
Pasojat e virusit mund të shfaqen edhe pas 4-8 javësh. Sipas vëzhgimeve dhe rasteve, mjekët deklarojnë se problemet më të mëdha shkaktohen në tru.
Këtë gjë e thekson edhe mjekja neurologe Entela Basha, e cila deklaron se 30% e të shtruarve aktualisht në pavijonin e neurologjisë, janë pacientë të cilët kanë dalë nga spitalet covid.
“Vihen re disa sëmundje të tjera, pas javës së 4-8, pas kalimit të covid-19, që janë të lidhura me tromboza në organe të ndryshe. Në shërbimin tonë neurovascular, mund të themi që 30% e pacientëve që kemi aktualisht të hospitalizuar, janë pacientë të cilët e kanë kaluar Covid para 4 deri në 8 javë përpara”, thotë neurologia.
Basha tregon shkaqet, pse ndodhin këto problem pas negativizimit nga virusi.
“Ajo që kemi vënë re, te pacientët që kanë ardhur, nuk e kanë vazhduar terapinë e sugjeruar nga specialistët, duke shkaktuar ndryshime në atë që populli e quan trashje të gjakut, dhe duke u bërë shkak për pjesën e trombozave”, ka theksuar mjekja Basha.
Një nga problemet e tjera që shkakton covid-19, është edhe tjetërsimi i nuhatjes. Më rrallë ndodh ndryshimi i shijes. Këto pasoja janë te pacientë të cilët e kanë kaluar covid-19 në stad të lehtë.
“Pacientët që e kanë kaluar covid-19, ose janë në fazat e fundit të rikuperimit, vënë re se nuhasin aroma që nuk janë në ambientin që i rrethon. Është ende herët për të dalë në konkluzion nëse ky virus vërtet shkakton probleme të bulbido-faktor, i cili është përgjegjës për nuhatjen, apo është thjesht ndoshta një gjetje rastësore”, është shprehur mjekja.
Ndër të tjera mjekja ka bërë apel që të shëruarve që nuk i është rikthyer pas një kohe të gjatë nuhatja dhe shija, të konsultohen me neurologun, pasi mund të kenë probleme të cilat rrezikojnë shëndetin./Gazetareforma.com/
