Ditën e sotme është mbledhur për herë të parë Këshilli Bashkiak Kukës që prej skandalit që përfshiu ish-kryetarin e Bashkisë Kukës Safet Gjicin.
Bëhet e ditur se kryetari i Këshillit të Bashkisë Albert Muja në fjalën e tij kërkoi ndjesë dhe tha se duhet të vijojmë punën edhe pse kjo tashmë i përket së kaluarës. Fasli Gërmizi, i vetmi këshilltar që kundërshtoi fjalën e kryetarit të këshillit, dënoi videon e turpshme të Safet Gjicit dhe kërkoi që të gjithë këshilltarët përfshirë edhe drejtuesit aktual të bashkisë Kukës të japin dorëheqje.
Gjatë mbledhjes së këshillit u prezantua Granit Gjana në detyrën e ushtrimit të funksionit të kryetarit të Bashkisë Kukës. Ndërkohë në mbledhje ishte edhe deputeti i PS Pandeli Majko, i cili ishte drejtues politik i fushatës elektorale të Safet Gjicit në zgjedhjet e 14-Majit. Theksojmë se publikimi i një video erotike e fundosi Safet Gjicin, ku menjëherë në një deklaratë zyrtare ai dha dorëheqjen ndërsa nuk vonoi shumë dhe qeveria e shkarkoi nga detyra si kryebashkiak i Kukësit.
Theksojmë se video ishte realizuar me datë 6 qershor 2023, ndërkohë që kishte disa ditë që qarkullonte në rrjetin e ‘Whats App’ duke u përdorur si një formë presioni ndaj kryebashkiakut të Kukësit, Safet Gjici.
