Gjatë ceremonisë së medaljeve në Kampionatin Europian të Mundjes në Bratislavë, një situatë e pakëndshme ndodhi kur Chermen Valiev, mundësi çeçen që përfaqëson Shqipërinë, u përball me një reagim të ashpër nga zv.presidenti i Federatës Ruse të Mundjes, Mikhail Mamiashvili.
Ky i fundit, teksa i vendoste medaljen e artë, e quajti Valievin “tradhtar”, duke e akuzuar për ndërrimin e përfaqësimit nga Rusia në Shqipëri.
Në një intervistë për “Shqipëria Live”, Valiev sqaroi se nuk u prek nga komentet dhe se zgjodhi të fokusohej te triumfi i tij historik.
“Ndoshta ishte i emocionuar sepse unë dola në finale dhe bëra një ndeshje me kampionin rus, me ish-kampionin olimpik. Ai ndoshta kishte shpresa që kampioni rus do merrte medalje ari dhe në emocione nuk e mbajti dot veten. Tha disa fjalë të ashpra, që unë më parë përfaqësoja Rusinë dhe tani Shqipërinë. Nuk më mërziti aspak. E harrova këtë moment shumë shpejt dhe u mundova të shijoja medaljen, sepse për herë të parë u bëra kampion Europe. Kam marrë shumë mesazhe urimi, edhe sot vijojnë mesazhet. Më mbështesin dhe fansat e mi në Rusi, edhe fansat e mi në Shqipëri.
Familja ime më mbështet. Ata janë të lumtur që unë mora medaljen e artë. Unë ndihem shkëlqyeshëm dhe jam i lumtur që i solla medaljen e artë Shqipërisë.
Mund të them që medalja e bronzit që mora në Paris ishte shumë moment i bukur, por kjo ishte medalje ari dhe i gëzohem më shumë”, thotë Valiev.
