Një numër i madh të dënuarisht në burgun e Rrogozhinës janë futur në grevë urie duke iu bashkuar kështu të dënuarve të tjera në burgjet e Peqinit, Reçit, Shënkollit dhe Burrelit.
BallkanWeb ka mësuar se drejtuesit e burgut u kanë kërkuar të burgosurve që të ndalojnë menjëherë grevën pasi nëse vazhdojnë do të futen në izolim.
Por edhe pse të dënuarit kanë refuzuar ushqimin prej disa ditësh, drejtuesit kanë mohuar mundësinë e një greve apo izolimi për ta.
Më herët gjatë ditës së sotme ministrja e Drejtësisë Etilda Gjonaj shkarkoi nga detyra drejtorin e Burgut të Peqinit Bukurosh Malluta me argumentin se keqmenaxhoi situatën pasi disa të dënuar hynë në grevë urie.
Në një letër drejtuar institucioneve përkatëse edhe medias, të dënuarit listojnë një sërë kërkesash që duan t’u plotësohen. Ata kërkojnë amnisti gjithëpërfshirëse 5-vjeçare, pa asnjë kriter.
Ndërsa thonë se burgimi i përjetshëm duhet të përcaktohet dhe të jetë 20 vjet si në vendet e Bashkimit Europian, si dhe të aplikohet lirimi me kusht, pasi të kryejnë 3/5 e dënimit. Regjimin e posaçëm “41 bis” e konsiderojnë një shkelje të të drejtave.
Ushqimin e kanë refuzuar edhe të dënuarit në Burgun e Reçit, të Shënkollit si dhe një sektor në burgun e Burrelit.
