Pas dështimit që koalicioni “Bashkë Fitojmë” pësoi në zgjedhjet lokale, deputeti i PD-së, Edi Paloka mendon se Sali Berisha nuk duhet të tërhiqet nga pozicioni politik që ai ka. Paloka shton se një arsye e fortë që Berisha të mos e bëjë këtë lëvizje është fakti që kjo është një kërkesë që vjen nga kryeministri Rama.
Ai tha se koalicioni “Bashkë Fitojmë” megjithëse nuk kishte numërues dhe komisionerë, arriti të marrë mbi 500 mijë vota.
“Ne e dimë realitetin, ky është realiteti. E dimë që i vjedhin, manipulojnë. Ne duhet të marrim përgjegjësinë për tu përballur me këta. Ju i patë vetë si shkuan zgjedhjet. Përgjegjësitë tona janë ato që u thashë. Ne përballemi me një realitet që është ky, një qeveri që vjedh dhe manipulon. Ju po e bëni si ai çobani me lopën që i thonë ke faj. Ose të përballemi ose të shkojmë të gjithë në shtëpi. Asnjë hap s’ka pse të bëjë pas Berisha se e kërkon Rama. E kërkojnë këtë që të shkalafitet opozita. Ju po thoni hajde ti japim një dorë Ramës”, deklaroi Paloka.
Ndërkohë i pyetur për dorëheqjen e Enkelejd Alibeajt si kryetar i komanduar i PD-së, një ditë më parë, Paloka tha se “Nuk dorëhiqet një njeri nga një post që nuk e ka pasur kurrë. Alibeaj e mbaroi misionin, aq ia kishin caktuar. Ai e çoi misionin deri në fund. Koalicioni “bashkë fitojmë” mori mbi 500 mijë vota, pa pasur komisionerë, sigël, financim, numërues. Unë e kam thënë më shumë se një herë, ky është realiteti”.
