Pas 23 ditësh grevë urie në qendër të Athinës, shqiptari Pano Ruçi ka vendosur të ndalë protestën e tij pasi autoritetet greke kanë pranuar të gjitha kërkesat që ai kishte paraqitur. Ruçi kishte kërkuar zhvarrosjen e trupit të djalit të tij, Denis Ruçi, i cili humbi jetën në tragjedinë hekurudhore të Tempes, si dhe kryerjen e analizave të specializuara për zbardhjen e plotë të rrethanave të ngjarjes.
Në deklaratën e bërë publike gjatë ditës së sotme, Ruçi nënvizoi rëndësinë e transparencës së plotë në procesin e ekzaminimeve toksikologjike dhe të gjitha testeve të tjera, për të cilat tashmë është dhënë miratimi për t’u kryer.
Ai tregoi se 23 ditët e grevës kanë qenë ndër më të vështirat e jetës së tij, të mbushura me dhimbje dhe lodhje, por se durimi dhe mbështetja e njerëzve i kanë dhënë forcë për të vazhduar betejën për drejtësi.
“Do të jem këtu derisa të marr përgjigje për të gjitha kërkesat e mia,” u shpreh Ruçi, duke theksuar se pavarësisht ndërprerjes së grevës, nuk do të ndalojë derisa të sigurohet se qeveria i ka zbatuar plotësisht ato.
Ndërkohë, avokatja e tij, Zoi Konstantopulu, deklaroi mbrëmjen e së martës nga Sheshi Sintagma:
“Sot drita mposhti errësirën. Me forcën e shpirtit të tij dhe të gjithë shoqërisë, Pano sfidoi mekanizmat më të ashpër dhe të pamëshirshëm. Fshehja dhe skemat për të mbuluar të vërtetën nuk triumfuan. Rikthimi në qarkullim i dosjes me 3,000 faqe që dokumenton neglizhencat e institucioneve është dëshmi se lufta dhe këmbëngulja e tij nuk ishin të kota.”
Rasti i Pano Ruçit ka prekur opinionin publik në Greqi dhe Shqipëri, duke u kthyer në simbol të kërkesës për drejtësi dhe transparencë në tragjedinë e rëndë të Tempes që mori dhjetëra jetë.
