Partizani ka zyrtarizuar këtë të mërkurë emërimin e trajnerit të ri. Mladen Milinkoviç është ulur në stolin e të kuqve, duke marrë drejtimin e skuadrës pas dorëheqjes së Skënder Gegës.
Prezantimi i trajnerit serbo-boshnjak u zhvillua në ambientet e “Arenës së Demave”, ku 57-vjeçari firmosi kontratën që e lidh me gjigandët e Superiores në një moment vendimtar për rikthimin e ekipit në elitë.
Milinkoviç është një figurë e njohur për futbollin shqiptar. Ai ka drejtuar më herët Luftëtarin e Gjirokastrës në sezonin 2016–2017, duke e renditur në vendin e katërt, si dhe ka pasur një periudhë të shkurtër në krye të Kukësit.
Përveç aventurës në Shqipëri, ai ka qenë në krye të skuadrave si Keshla (Azerbajxhan), Syrianska (Suedi), Buduçnost Podgorica (Mali i Zi) dhe Al Sahel (Kuvajt).
Trajneri i ri pritet të debutojë në ndeshje zyrtare më 23 gusht, në sfidën hapëse të kampionatit ndaj Vorës. Ai merr drejtimin e Partizanit në një periudhë të vështirë, pas zhgënjimit në garat europiane dhe eliminimit të hershëm në Conference League, që solli dhe largimin e Gegës nga pankina.
Objektivi i klubit mbetet i qartë: rikthimi në majën e futbollit shqiptar. Stafi dhe skuadra janë në përgatitje intensive për sezonin e ri, ndërsa pritshmëritë nga tifozët janë të larta.
Milinkoviç vjen në kryeqytet pas një kohe të shkurtër pa ekip, që nga prilli 2024, kur u largua nga Buduçnost, me të cilën fitoi dy kampionate dhe një Kupë në Malin e Zi.
