Parlamenti ka miratuar kandidaturën e Presidentit të Republikës Ilir Meta për kryetarin e ri të Kontrollit të Lartë të Shtetit. Arben Shehu ka marrë 108 vota pro, 5 kundër dhe 4 abstenim.
Pas votimit, Shehu ka bërë dhe betimin si kreu i ri i Kontrollit të Lartë të Shtetit, duke falënderuar deputetët e Kuvendit për besimin që i dhanë.
Kreu i ri i KLSH vjen nga bota akademike dhe ka eksperiencë në fushën e jurispridencës.
Ai ka një eksperiencë mbi 16-vjeçare në jetën akademike dhe është diplomuar gjithashtu edhe në fushën e ekonomisë dega “Administrim Biznesi”, me një eksperiencë të gjatë akademike, kërkime dhe shkrime shkencore, por edhe përvojë në zbatimin e ligjit, si ushtrues aktiv i profesionit të avokatisë.
Shehu ka lindur në janar të 1980 në Shkodër, shkollën e mesme e përfundoi te gjminazi “Halim Xhelo” në Vlorë dhe është diplomuar në Fakultetin e Drejtësië në Tiranë. Aktualisht është pedagog në Fakultetin e Drejtësisë së Universitetit të Tiranë, te Departamenti i të Drejtës Penale.
Arben Shehu, u vlerësua si kandidat i përshtatshëm për drejtimin e Kontrollit të Lartë të Shtetit, si një institucion që ka nevojë për një qasje të re në ushtrimin e funksioneve për kontrollin e përdorimit të pasurisë publike dhe vënien para përgjegjësisë të abuzuesve me to.
Në viti 2005 ka kryer masterin për Shkenca Penale, ndërsa në 2011 mori gradën Doktor i Shkencave me mikrotezën “Krimi i Organizuar dhe legjislacioni ndërkombëtar”. E në 2011 vazhdoi ciklin për titullin Prof.Asociuar në Fakultetin e Drejtësisë në universitetin e Tiranës. Shehu në 2003 mori licencën e avokatit.
Si eksperiencë të punës në karrierën e tij mund të përmendimin dhe si përfaqesues për çështje ekonomike dhe ligjore pranë disa shoqërive tregtare, redaktor ne “World Journal of Social Science Research” dhe anëtar i Komitetit të Ekspertëve/Trajnuesve Qendra EDFAT.
