Rruga që çon në fshatin turistik të Dardhës është bllokuar prej disa orësh për shkak të një numri të madh turistësh.
Disa prej tyre kanë fikur automjetet dhe janë nisur në këmbë drejt fshatit, duke penguar kalimin e automjeteve.
Pavarësisht përpjekjeve të Policisë Rrugore, aksi mbetet i bllokuar, pasi një pjesë e turistëve kanë lënë makinat në mes të rrugës dhe janë ngjitur për në fshat.
Dardha mbetet një nga destinacionet më të frekuentuara gjatë dimrit, veçanërisht për mundësinë e ushtrimit të sporteve dimërore në pistën e skive.
Megjithatë, kjo situatë ka krijuar vështirësi për pushuesit dhe për punën e Policisë Rrugore të Korçës, e cila po përpiqet të menaxhojë trafikun dhe të lirojë rrugën.
