Mbrëmjen e djeshme kryeministri Edi Rama deklaroi se të gjithë eksponentët e Partisë Socialiste që dalin nga rruga e Zotit apo ligjit nuk do të kenë mbështetjen e tij. Ai deklaroi në emisionin e Erla Mëhillit se kushdoi që korruptohet nuk mund të mbahet pas tij.
“Kush e lëshon veten dhe ngatërron rrugën dhe del nga rruga e Zotit dhe e ligjit nuk ka asnjë shans që të mbahet pas meje, pas shkopit të flamurit të Partisë Socialiste dhe të socialistëve. Kjo është shumë e qartë. Unë nuk jam ai që sot është faqja e zezë e Shqipërisë, që me demek nuk i lëshonte kriminelët. Drejtorin e tatimeve të Republikës së Shqipërisë e mbante në detyrë në arrest shtëpie, ishte në arrest shtëpie dhe ishte drejtor. Kriminelët e 21 janarit nuk ia dorëzoi prokurorisë dhe kështu me radhë.
Jo që nuk i mbroj kriminelët e të korruptuarit, por unë jam marrë personalisht dhe kam udhëhequr Reformën në Drejtësi që ata të bëhen të pambrojtshëm nga askush, as edhe nga unë, nëse unë luaj mendsh dhe shkoj t’i mbroj nga drejtësia”, theksoi kreu i qeverisë.
Në fakt kjo deklaratë kjo shkon me linjën politike që ka ndjekur kryeministri Edi Rama ndaj të githëvë zyrtarëve socialist që kanë pasur probleme me drejtësinë. Ata janë braktisur në momentet e tyre më të vështira.
