Ka përfundur mbledhja e Këshillit Politik.
Pas takimit përfaqësuesit e forcave të ndryshme politike kanë folur për mediat.
Kryetarja e Grupit Demokrat, njëherësh dhe bashkëkryetare e Komisionit të Reformës Zgjedhore, Rudina Hajdari, u shpreh se ndryshimi i sistemit nuk është në fokus të tryezës së bisedimeve për Reformën Zgjedhore, po as nuk është përjashtuar.
“U diskutua fakti që roli jonë kyç në këtë tryezë tregon se ne do vazhdojmë të japim kontributin tonë dhe komisioni do vazhdojë e do ketë rolin e saj lidhur me rolin që çdo përfaqësues ka në atë komision. Si bashkëkryetar ne kemi një fuqi prevaluese, mundësinë e vetos në produktin final, që do kalohet në parlament. Për ne është e rëndësishme që produkti final duhet të jetë një produkt që të jetë sa më gjithëpërfshirës dhe të përfshijë sa më shumë aktorë politikë. Për ne është e rëndësishme që të arrijmë një konsensus dhe me sa shoh edhe palët tjera kanë filluar të flasin për ndryshim të sistemit, pra nuk është përjashtuar nga tavolina, por po gjithëpranohet nga palët e tjera. Është një gjë për t’u parë.”
Ndërsa, Damian Gjiknuri tha se akuzat e opozitës kundër tij kanë qenë retorika politike, por shtoi se është i lumtur që PS e PD janë në një tryezë së bashku.
“Kjo është një tavolinë formale, roli në fund u mbetet përfaqësuesve politikë. Prioritet për këtë grup pune është objekti i punës së komisionit, çështjet e administrimit zgjedhor, pse jo edhe të sistemit. E rëndësishme është që të fokusohemi tek çështjet konkrete. Partia Demokratike ka bërë një kthesë të madhe nga qëndrime te saj ekstremiste, akuzat e saj kanë qenë dhe retorikë politike dhe unë jam shumë i lumtur që PD-PS dhe të tjerat u ulën për kompromis”.
Nga ana tjetër, Oerd Bylykbashi në deklaratën e tij u shpreh se është konstituar Këshilli Politik dhe janë mandatuar anëtarët që të bëjnë ndryshime me konsensus.
“Sapo u konstitua Këshilli Politik sipas dokumentit të kompromisit për fillimin e refomës zgjedhore, dokument i cili përcakton procedurën në çfarë mënyre do të ecë kjo reformë zgjedhore, e cila duhet të mbyllet brenda 15 marsit. Ky Këshill autorizon përfaqësuesit politikë dhe ekspertët që të operojnë me konsensus. Ky konsensus duhet të qendrojë deri në momentin e miratimit, siç është dakortësuar në dokumentin e kompromisit dhe ajo që ne bëmë të ditur, qendrimin e opozitës së bashkuar, i cili do të bëhet publik është prioriteti i çështjeve, që pëpruthet 100% me prioritetet që përcakton OSBE/ODIHR”.
Kujtojmë se para dy ditësh u mbajt tryeza parlamentare e Reformës Zgjedhore.
Qëllimi i tryezës politike, është arritja e një konsensusi pa praninë e ndërmjetësuesve të huaj.
Reforma Zgjedhore pritet të miratohet jo më larg se 15 marsi.
