Pandemia e koronavirusit po vazhdon me gjithë agresivitetin e saj në Shqipëri, duke mos kursyer madje as jetët mjekëve.
Kështu në radhët e bluzave të bardha ka humbur jetën mjeku i njohur, Ilirjan Draçi.
Lajmin e hidhur e ka shpërndarë në rrjetet sociale edhe ministrja e Shëndetësisë, Ogerta Manastirliu, e cila thekson se, ka ndërruar jetë doktori Ilirjan Draçi.
Sipas ministres, mjeku ishte i shtruar te Spitali Infektiv, por nuk ia ka dalë në betejën me virusin e pabesë me gjithë përpjekjet e mëdha të kolegëve.
Kujtojmë se mjeku kishte postuar më 8 nëntor një foto teksa ishte në spital me maskë oksigjeni.
“Beteja vazhdon, bëni kujdes se një gabim i vogël i’u kushton jetën”,- shkruante ai.
Draçi ka shërbyer për vite me radhë si mjek dhe drejtues në poliklinikën e specialiteteve nr.1.
Mesazhi i ministres Manastirliu:
“Dr. Ilirjan Draçi ishte mjeku që me profesionalizëm e përkushtim i shërbeu komunitetit të banorëve të Tiranës për vite e vite me rradhë si mjek dhe drejtues në poliklinikën e specialiteteve nr.1.
Dr. Ilirjani nuk ia doli në betejën me virusin e pabesë me gjithë përpjekjet e mëdha të kolegëve në spitalin Infektiv.
E trishtuar nga kjo humbje e madhe për të gjithë ne. Do na mungojë shumë energjia e pashtershme dhe shpirti i sakrificës së një mjeku model, qytetari të mirë dhe drejtuesi të zotë.
U prehsh në paqe dr. Draci😢
Ne do ta fitojmë luftën ndaj këtij armiku të padukshëm të gjithë #bashkë!”
/GazetaReforma.com/
