Pyetja që natyrshëm i lind secili pas nisjes së vaksinimit masiv në Shqipëri është “kur mund t’i rikthehemi normalitetit?“ Lidhur me këtë kanë folur edhe Skënder Brataj e Mira Rakacolli. Të ftuar në Real Story ata kanë thënë se ka premisa të mira që vera të vijë më e lehtuësuar.
Rakacolli ka thënë se brenda majit pritet të vaksinohen 500 mijë shqiptarë duke u bërë kështu persona që ndërpresin infeksionin.
“Këtë nuk e bëjmë, sepse mund të gabojmë. Por premisat janë shumë të mira, sidomos me vaksinimin masiv që po bëhet, por s’është vetëm vaksinimi. Nëse nuk respektojmë masat, maskat, disatncimi fizik, social, edhe pasi të bëjmë vaksinën, vetëm nëse do të vazhdojmë kështu, drita që është ndezur afrohen shumë. Me 500 mijë shqiptar që priten të jenë vaksinuar brenda majit, ato nuk duhen parë si persona që jo vetëm nuk infektohen, por si persona që ndërpresin infeksionin”, tha Rakacolli.
Nga ana tjetër, kreu i Urgjencës Kombëtare ka thënë se është optimist për sa i përket procesit të vaksinimit dhe se plani mund të mbyllet më përpara me 1 milionë dozat që do të vijnë nga Kina. Brataj është shprehur optimist se vera do të vijë shumë e lehtësuar.
“Unë jam optimist, sa i përket procesit të vaksinimit në Shqipëri, për arsye se ne thamë që do bëjmë 12-15 mijë vaksinime, por vajtën 20 mijë. Kështu që plani ynë mund të mbyllet shumë më përpara, duke ditur që 1 milionë do të vijnë nga Kina, dhe shumë të tjera nga kompanitë e tjera, që shkojnë te 3 milionë. Jam shumë optimist se vera do të vijë shumë e lehtësuar”, tha Brataj.
