Pamje alarmante nga Tuneli i Llogarasë kanë ngritur shqetësime të forta mbi sigurinë dhe cilësinë e kësaj vepre të shumëreklamuar infrastrukturore. Në një video të publikuar së fundmi shihet qartë se tavani i tunelit është çarë dhe prej tij rrjedh ujë në formë rrëke, duke krijuar një situatë që ngjall frikë dhe pasiguri për drejtuesit e mjeteve që kalojnë çdo ditë aty.
Videoja është filmuar nga një qytetar, i cili mes ironisë dhe zemërimit e cilëson atë si “tuneli i Ballukut”, duke shtuar se “Palloshi u shpu”. Pamjet flasin vetë. Uji pikon pandërprerë nga tavani, duke ekspozuar probleme serioze teknike në një vepër që është paraqitur si simbol i investimeve dhe modernizimit.
Gjatë komentimit të pamjeve, gazetari Artan Hoxha kujtoi se këto rreziqe ishin paralajmëruar më herët. Ai iu referua një dosjeje të hetuar nga SPAK, ku përfshiheshin mesazhe të një inxhinieri grek, i cili shprehte shqetësim të thellë për mungesën e hekurit në ndërtimin e tunelit.
“Inxhinieri grek në dosjen e SPAK thotë: ‘futini hekur tunelit’. Pra unë uroj që dëmi të mos jetë, sepse dëmin e paguajnë shqiptarë”, u shpreh Hoxha, duke theksuar se çdo defekt i rëndë nuk ka vetëm pasoja teknike, por edhe financiare për qytetarët.
Deri më tani nuk ka asnjë reagim zyrtar nga autoritetet përgjegjëse, ndërsa pamjet nga Tuneli i Llogarasë shtojnë dyshimet dhe frikën se pas propagandës dhe inaugurimeve fshihen probleme serioze ndërtimore, me pasoja që mund të jenë shumë më të rënda sesa një rrjedhje uji.
