Edhe pse Basha në deklaratën e tij për mediat ka thënë se nuk mund t’ju kthejë asnjë përgjigje ndërkombëtarëve, krejt tjetër qëndron situata me nënkryetarin e partisë, Edi Palokën.
Në një lidhje të drejtpërdrejtë në “Opinion”, Paloka ka folur hapur për marrëdhëniet që PD-ja ka me instancat ndërkombëtare, ndërkohë që theksoi se deklaratat e ambasadorëve nuk kanë qenë normale.
Sipas tij OSBE-ja duhet të shohë edhe gazetarët që u mbytën sot nga gazi në protestë dhe jo vetëm një gomë të djegur nga opozita.
Megjithatë edhe një herë tjetër Paloka ka thënë se tashmë nuk ka më kthim mbrapa dhe se 16 shkurti i vendosi vulën rrugës së tyre.
Pjesë nga intervista
Fevziu: Si e keni marrëdhënien me ndërkombëtarët?
Paloka: Në radhë të parë, për reagimet që ka pasur brenda për brenda, nuk kanë qenë fare normale. Ne mendojmë, që të kenë qenë vetëm për shkak të kufizimit të informacionit. Ka pasur edhe reagim, që janë blerë zgjedhjet, por nuk kanë ndikuar. Po bëhet tragjike, jo komike. Qëndrimi i zotit Basha ka qenë i qartë, kërkojmë asgjë më shumë që të mbajnë ndaj shqiptarëve atë qëndrim që kërkojnë në vendet e tyre. Deklaratat e tyre kanë qenë publike, edhe përgjigjet tona kanë qenë publike. Sot ne jemi me qytetarët. Interesi më i madh është ku do të shkojnë qytetarët. Po mediat që u mbytën me gaz i panë ata? Duhet t’i shohë edhe OSBE-ja këto.
Fevziu: Do vazhdoni edhe nëse ndërkombëtarët do të jenë të fortë kundër kësaj rruge?
Paloka: Ne e kemi zgjedhur këtë rrugë. Edhe ndërkombëtarët, ju e dini që bojkoti nuk pranohet si parim nga ndërkombëtarët, por absolutisht edhe koha ka treguar se në një moment të caktuar kur gjërat qartësohen, ikin interesat e brendshme këtu të diplomatëve që i kemi parë që lidhen me qeverinë, çdo gjë shkon ku duhet. Nuk ka kthim prapa. 16 shkurti i vuri vulën rrugës sonë.
