Qeveria shqiptare ka qenë tepër dorështrënguar me qytetarët e saj gjatë karantinës së parë të pandemisë së koronavirusit, por edhe tani që ka nisur e dyta, asnjë lloj ndihme direkte nuk është parashikuar.
Vetëm dy paketa të cunguara financiare ishin ndihma e vetme që qeveria dha për një pjesë të bizneseve dhe të të punësuarve gjatë karantinës, në një kohë që pandemia krijojë një gropë të madhe në ekonomi dhe bëri të mbyllen dhjetëra biznese.
Por duket se Bashkimi Europian e ka kuptuar situatën ku gjendet vendi ynë dhe për këtë i ka akorduar Shqipërisë 103.3 milionë euro, për rikuperimin ekonomik, duke marrë shkas nga situata e krijuar nga pandemia.
Mësohet se sot Komisioni Europian ka miratuar paketën për të mbështetur vendin tonë.
Komisioneri i BE për Fqinjësinë dhe Zgjerimin, Olivér Várhelyi, deklaroi se Bashkimi Evropian vazhdon të qëndrojë pranë Shqipërisë.
“Përballë krizës COVID-19, ne kemi bërë rregullime të fondeve ekzistuese për të ndihmuar Shqipërinë, që t’i rezistojë sfidave aktuale sociale dhe ekonomike”,- ka deklaruar Várhelyi.
Përmes një postimi në ‘Twitter’, ambasadori i BE-së në Tiranë, Luiggi Soreca, theksoi se, ky fond do të përballojë sfidat ekonomike dhe shoqërore aktuale.
Financimet janë dhënë gjithashtu për zhvillimin e një tregu dinamik të tokës në Shqipëri, përmes krijimit të një kornize të qartë të të drejtave të pronës.
Paketa gjithashtu vazhdon të mbështesë përmirësimin e kapacitetit të sektorit publik për t’iu përgjigjur nevojave të qytetarëve dhe bizneseve. Programi do të funksionojë si në nivelin kombëtar ashtu edhe në atë lokal.
Më në fund, paketa aktuale plotëson masat e tjera të lidhura me COVID-19 të vendosura për Shqipërinë nga BE, duke zgjeruar mbështetjen për bizneset dhe ekonominë e përgjithshme.
/GazetaReforma.com/
