Paketa ligjore “Anti-shpifje” e propozuar nga qeveria ka hasur në kundërshtime të forta brenda dhe jashtë vendit.
Janë 37 organizata në vende të ndryshme të botës, të cilat i bëjnë thirrje qeverisë shqiptare, që të tërheqë paketën ligjore.
Në deklaratën e publikuar nga Komiteti Shqiptar i Helsinkit thuhet se pjesë e nënshkruesve janë 10 Komitete të Helsinkit me reputacion të lartë në mbrojtjen e të drejtave dhe lirive të njeriut, të cilat i kanë qëndrat në Hollandë, Norvegji, Serbi, Maqedoni, Bullgari, Armeni, Poloni, Greqi, etj.
Nga 37 organizatat që kanë nënshkruar, 35 janë pjesë e “Solidarity Platform”.
Kjo organizatë ka theksuar, se masat e ndërmarra nga qeveria shqiptare bien ndesh me angazhimet që Shqipëria ka mërrë në kuadër të kryesimit të OSBE-së dhe me nevojën për siguri dhe stabilitet.
Sipas deklaratës së përbashkët, të 37 organizatat shprehen se Shqipëria, duke qenë në krye të OSBE-së, duhet të jetë model për vendet e tjera përsa i përket lirisë së mediave.
Me paketën “Anti-shpifje”, qeveria pretendon të luftojë lajmet e rreme.
Gazetarët, analistët dhe aktivistët e kanë kundërshtuar me forcë nismën e qeverisë, duke e cilësuar si cenim i fjalës së lirë.
