Pas shpërthimit të tritolit në hotelin në pronësi të të Mariel Muratit, ish-Drejtor i ALUIZNI Sarandë, aktualisht Drejtor i FSDKSH Sarandë, policia ka shoqëruar 10 persona të cilët janë marrë në pyetje nga policia e Sarandës gjatë natës. Kryesisht janë dëshmitarë të cilët janë ndodhur në vendin e ngjarjes gjatë momentit të shpërthimit në hotelin e Muratit, por ende nuk ka asnjë të dyshuar për ngjarjen. Ndërkohë nga burime pranë grupit hetimor bëhet me dije se kamerat e hotelit “Yacht” kanë qenë jashtë funksionit në momentin e ngjarjes duke vështirësuar punën e policisë, e cila tanimë është detyruar të sekuestrojë kamerat e bizneseve dhe banesave përreth vendit të ngjarjes.
Sipas situatës se si ka ndodhur ngjarja dhe sasisë së tritolit të vendosur mendohet se autorët nuk kanë pasur qëllim shkatërrimin e hotelit, por ka qenë një paralajmërim ndaj pronarit të hotelit, ose një tentativë për prishjen e imazhit. Sasia e tritolit e vendosur tek garazhi i tij ka qenë 50 gram, e për pasojë nuk ka shkaktuar dëme të mëdha materiale edhe pse zhurma e shpërthimit u dëgjua fuqishëm në gjithë qytetin.
Madje dyshohet se autori ose porositësi të jetë i njëjte me ngjarjen e një viti më parë kur në të njëjtin hotel u vendos eksploziv. Kjo për shkak se në rastin e 9 shkurtit 2021, ora e vendosjes ishte 19.10 ndërsa kësaj radhe 22.33, pra janë zgjedhur orare kur në qytet ka lëvizje dhe mundësia e përhapjes së panikut është më e madhe, jo si në raste të tjera kur është vendosur eksplozivi në orët e para të mëngjesit me qellim shkatërrimin e objektivave.
