Emigrimi i shqiptarëve drejt vendeve të BE ka qenë gjithmonë një temë shumë aktuale për vendin tonë.
Vitet e fundit, ata që janë larguar më shumë nga Shqipëria janë infermierët dhe mjekët.
Nga viti 2010 deri në vitin 2017 janë larguar nga vendi 772 mjekë, me arsim të përgjithshëm ose me specializime pasuniversitare, sipas të dhënave nga Forumi Ekonomik Ndërkombëtar i Vjenës.
Sipas “Monitor”, ky numër përfaqëson me shumë se tre gjenerata të dala nga Fakulteti i Mjekësisë në Universitetin e Tiranës ku diplomimet mesatare në një vit janë më pak se 200 mjekë.
Nga 7 gjenerata të diplomuarish, 3 kanë emigruar gjatë peridhës në studim.
Numri total i mjekëve shqiptarë në emigrim është 1029, por 772 prej tyre kanë emigruar nga viti 2010-në në 2017, por ky numër realisht është edhe më i lartë pasi nga 2017 në 2020 emigrimi i trupës mjekësore ka vijuar me ritme të larta.
Ekspertët e Vjenës analizojnë se pandemia Covid-19 do të nxisë edhe më shumë emigrimin e trupës mjekësore nga vendet në Zhvillim dhe Europa Lindore drejt Perëndimit, pasi pandemia Covid nxori në pah se sistemet shëndetësore në vendet e zhvilluara kishin mangësi.
Ajo që do e nxisë edhe më shumë emigrimin e mjekëve në Shqipëri është niveli i ulët i pagave dhe nevoja për mjekë në vendet perëndimore.
Shqipëria është vendi me numrin më të ulët mjekëve dhe infermiereve për banorë ndër vendet e Europës dhe Ballkanit perëndimor, por emigracioni do ta përkeqësojë më tej këtë trend.
Në vitin 2017 përllogaritet se 18 për qind e fuqisë punëtore në shëndetësi ndodhet jashtë vendit, veçanërisht në Gjermani.
Gjermania, Mbretëria e Bashkuar, SHBA ja dhe Kanada, janë vendet e preferuara të emigrimit për mjekët shqiptarë.
Lehtësimi i procedurave nga Gjermania mund të nxisë më tej emigracionit drejt këtij vendi.
