Policia e Durrësit ka arrestuar një 28-vjeçar dhe ka proceduar në gjendje të lirë dy persona të tjerë, 32 dhe 66 vjeç, për organizimin e basteve sportive të paligjshme.
Aktiviteti kriminal zhvillohej përmes celularëve në dy lokale të ndryshme në lagjen nr. 14 dhe në Rrashbull, Durrës.
Gjatë operacionit, autoritetet sekuestruan 3 celularë, të cilët ishin përdorur për zhvillimin e lojërave të fatit.
Hetimet po vazhdojnë për identifikimin e të tjerëve të përfshirë në këtë veprimtari të paligjshme.
Njoftim i Policisë
Si rezultat i kontrolleve është arrestuar në flagrancë një shtetas dhe u procedohen në gjendje të lirë 2 shtetas të tjerë , pasi u kapën në flagrancë në 2 lokale, duke organizuar lojëra fati, me celularë.
Specialistët për Hetimin e Krimeve të Komisariatit të Policisë Durrës, nga kontrollet e vazhdueshme në ambiente të ndryshme, të kryera me qëllim goditjen e rasteve të organizimit të kundërligjshëm të lojërave të fatit, kanë konstatuar se në dy lokale, në lagjet nr. 14 dhe Rrashbull Durrës, organizoheshin lojëra fati (baste sportive).
Në vijim të veprimeve procedurale është vënë në pranga shtetasi R. Gj., 28 vjeç, banues në Durrës, si dhe ka nisur procedimi në gjendje të lirë për shtetasit M. B., 32 vjeç, dhe E. Z., 66 vjeç, të dy banues në Rrashbull Durrës. Në cilësinë e provës materiale janë sekuestruar 3 celularët që përdoreshin për këtë veprimtari të paligjshme.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
